Importante nga dapat padayun nga manindugan ang Pilipinas sa kinamatarong sini bilang isa ka pungsod.
Ini ang ginpakigbahin ni Wennie Sancho sang General Alliance of Workers Association kasunod sang nagapadayun nga diskusyon sa West Philippine Sea nga pilit nga gina-angkon sang China.
Sa interview sang Bombo Radyo kay Sancho, iya ginpahayag nga indi pagpangkat para sa isa ka gyera ang pagpamatok sang Pilipinas sa pila ka lihok sang China batok sa pungsod, kun indi isa lang ka panindugan nga dapat gid ubrahun sang mga Pilipino.
Suno sa iya, kilala ang China bilang isa ka communist country nga naga-proteher sa ila nga mga trabahante, mga imol, kag sa mga ginapigos.
Apang pahayag naman ni Sancho, wala ini nagasanto sa ginabuhat sang Chinese authorities ukon pagpang-harras sang mga ini sa ordinaryo nga mga Pilipino kaangay sang mga manugpangisda.
Dugang pa niya, bisan ano pa nga pungsod ang mag-angkon sang nasambit nga baybayon, wala ang mga ini sang kinamatarong nga ipakanubo ang mga Pilipino nga padayun nga magapanindugan nga teritoryo sini ang West Philippine Sea.
