ILOILO CITY– Madamo sang mga rekord sa police station nga pagpang tonto kag wala mabayran nga utang ang babaye nga biktima sang salvage kag ginhal-id sa kilid sang highway sa Sitio Bool, Sapao Dumangas Iloilo.
Ang biktima amo si Marlene Deluda Serdeña, 31 anyos sang Sitio Gotilo San Miguel Buenavista Guimaras kag temporaryo nga naga istar sa Holy Family Subdivision Zone 8 Brgy Calumpang Molo, Iloilo City.
Sa interview sang Bombo Radyo kay Police Executive Master Sgt. Greg Matutino, imbestigador sang Molo Police Station iya ginpahayag nga ginpa blotter ukon ginreklamo ang biktima bangud sa swindling ukon pagpangtonto.
Santo sa ila rekord sang Mayo 18, 2019, ginreklamo si Serdeña ni Christian John Ablao Lencioco alyas ‘Janjan’, 29 anyos sang Zone 1 Calumpang Molo Iloilo City kag naga buy and sell.
Suno kay Matutino, gintanyagan sang biktima si Lencioco nga baligyaan sang bangrus kag lukon balor P97,000 kag ginpasalig nga ihatag sang Mayo 20, 2019.
Magluwas sini, ginpangayuan pa gid liwat sang biktima si Lencioco sang P47,000 kag ginpasalig nga ideliver ang order sini nga bangrus kag lukon sa Iloilo Fish Port Complex, sang Mayo 21, 2019.
Apang wala mahatag ang order sang tagreklamo sa diin madamo pa ini sang mga alibi.
Samtang sang Mayo 23, 2019 naman, nagpa blotter man ang biktima bangud ginapahog ini ni Lencioco.
Magluwas sa natabo, natukiban man nga may mga ginpasalig man ang mga biktima nga mga gwardya nga hatagan sang trabaho sa isa ka security agency.
Apang sa ulihi, ginkuhaan lang sila sang biktima sang kwarta.
Ini ang isa sa mga rason nga ginalantaw sang mga otoridad sa motibo sa pag salvage sa biktima.
Magabulig naman ang Molo PNP sa Dumangas Municipal Police Station agud madasig nga masolbar ang kaso.
