ILOILO CITY – Gin-athag ni National Police Commission Region 6 Director Atty. Joseph Celis nga kun magpatigayon ang kapulisan sang warrantless operation, mahimo ini nga indi mag uniporme.
Ini ang may kaangtanan sa una nga ginreport ni Punong Barangay Myde Sollano sang Barangay Progreso, Lapuz, Iloilo City nga ginkuha sang 4 ka mga naka sibilyan nga mga lalaki si Ramon Salarda, 66, pasakay sa salakyan.
Sa interview sang Bombo Radyo kay Atty. Celis, iya ginpahayag nga indi na kinahanglan nga mag uniporme pa ang pulis kun warrantless arrest ang himuon agud nga indi na makapalagyo pa ang subject apang nagakadapat nga dala sini ang ila tagsa ka mga tsapa kag ID.
Suno kay Celis, sa bahin naman sang salakyan nga gingamit, indi man kinahanglan nga ang patrol car sang pulis ang gamiton bangud mahimo nga magpalagyo pa ang subject kun mahibaluan nga dakpon siya sang otoridad.
Apang pahayag niya, indi man kinahanglan nga tabonan sang pulis ang iya nawong kaangay sang mask sa baylo mahimo ini nga maggamit sang kalo.
Posible nga nadala lamang sang kakugmat ang mga pumuluyo sang Progreso Lapuz rason nga nagdumdom ang mga ini nga abduction ang natabo bangud santu man sa pahayag ni PCapt. Shella Mae Sangrines, tagpamaba sang Iloilo City Police Office, nagapatigayon sang anti-illegal gambling operation ang syudad kag isa si Salazar sa gindakop.
