ILOILO CITY – Ginkatingala sang Sangguniang Bayan members sang Pavia, Iloilo ang indi na pagpahanugot sa kay sin-o man nga tiglawas sang Department of Public Works and Highways Region VI sa mga hearings may kaangtanan sa kontrobersyal nga Aganan kag Ungka flyovers.
Ang Committee on Infrastructure, Committee on Public Safety, kag Committee on Transportation sa Office of the Sangguniang Bayan sang Pavia, Iloilo ang nag-request sang presensya sang ahensya kag nagpangayo sang mga dokumento samtang wala pa naka-abot ang resulta sang soil test sang third party consultant nga Abinales Associates Engineers and Consultants (AAEC).
Lakip sa mga dokumento nga ginapangayo sang tatlo ka mga komitiba amo ang mga masunod:
*safety measures nga ipatuman samtang nagahulat sang engineering intervention sa Ungka kag Aganan flyover;
*resulta sang una nga soil test antes ang pag-ubra sang flyover;
*kontrata sa tunga sang contractor nga International Builders Corporation kag Department of Public Works and Highways;
*progress sang construction kun pila ka porsyento na ang natapos;
*percentage sang payment nga gin-release sang ahensya sa contractor;
*orihinal nga detailed engineering design sang mga flyover; kag
*revised detailed engineering design
Sa interview sang Bombo Radyo kay Sangguniang Bayan Member Jose Maria “Pyt” Trimañez, chairman sang Committee on Transportation, iya ginpahayag nga humalin sang nahibaluan nila nga may pag-usmod sa pila ka piers sang Ungka flyover, makapila sila ka beses nga naghingyo sang presensya sang ahensya.
May kaangtanan sa sabat sang ahensya nga pirmado ni Regional Director Nerie Bueno kun sa diin nakasaad nga may yara na sang pending nga kaso sa Office of the Ombudsman kag may pending request para sa congressional investigation, ginpahayag ni Trimañez nga indi man maka-apekto sa dalagan sang kaso ang ila ginapangayo sa ahensya ilabi na ang safety measures nga ipatuman sa mga flyovers.
Dugang pa niya, naintindihan man nila ang proseso kag ginarespeto ang sub judice rule, apang suno kay Trimañez, bisan ang safety measures lang kuntani ang mahatag sa ila agud nga mapahibalo man nila ang ila nga mga pumuluyo.
