ILOILO CITY- Natumod na ang duha sa anom ka mga suspek nga nagpatay sa Indian National sa sulod mismo sang iya nga balay sa Villa Paterna Subdivision, Brgy. Cano-an, Estancia, Iloilo.
Ang biktima amo si Kamal Deep Singh Braich, ginapahayag nga masobra isa na ka tuig nga nagatinir sa Estancia bangud sang iya nga negosyo, apang sa Roxas City, Capiz ang iya nga pamilya.
Ang duha ka mga suspek amo sanday Har Deep Singh, 23-anyos, isa man ka Indian National, temporaryo man nga nagatinir sa subdivision nga gina-estaran sang biktima; kag live-in partner sini nga si Krisa Abaygar,25, residente sang Calapdan, Estancia.
Sa interview sang Bombo Radyo kay PLt. Joebert Amado, hepe sang Estancia Municipal Police Station, iya ginpahayag nga mismo ang lalaki nga suspek ang nagtuad sa iya kaupdanan nga Indian national nga may kahilabtanan ini sa pagpatay sa biktima.
Suno kay Amado, apisar nga naaresto ang 23-anyos nga suspek, nakagwa ini sa presuhan matapos nga naglapaw na sa reglementary period ang pag-detain sa iya matapos nga nakulangan ang fiscal sa mga dokumento nga ginpasa sang Estancia PNP sa Prosecutor’s Office gani nahulog na lang sa regular filing ang kaso nga murder batok sa suspek.
Apang suno kay Amado, sa baylo nga magpauli, nagtinir nalang ang suspek sa police station bangud nahadlok ini sa posible himuon sa iya sang mga himata sang biktima.
Samtang, at-large naman si Abaygar nga suno kay Amado, wala na sa ila balay sang ginkadtuan sang otoridad kag suno sa hepe,ini nagapakita nga posible guilty ini sa krimen.
