Ginkumpirma sang Department of Foreign Affairs (DFA) nga aprubado na ang visa-free travel sang Indian nationals sa Pilipinas para sa “tourism purposes.”
Epektibo ini umpisa sa Hunyo 8, 2025.
Tuyo sang visa-free arrangement nga mapasangkad pa ang tourism arrivals halin sa India nga nagsaka na nga daan sa 12% sang 2024 pakadto sa halos 80,000 sandig sa data sang Department of Tourism (DOT).
Bisan sa nakit-an nga growth, gamay sa gihapon ang Indian arrivals sa Pilipinas kun lantawon ang kabug-usan nga masobra lima ka milyon nga nagbyahe sa Southeast Asia sang nagligad nga tuig.
Sa idalom sang visa-free policy, makasulod ang Indian nationals sa Pilipinas nga wala sang visa tubtub sa 14 ka adlaw. Apang ginklaro man nga dapat wala sila sang anuman nga derogatory record sa Bureau of Immigration.
Exempted sa visa-free scheme amo ang Indian nationals nga nagakadto sa Pilipinas para sa long-term visits kag non-tourism activities.
Nahibaluan nga ang naga-uyat sang valid visas ukon residence permits halin sa United States, Australia, Canada, Schengen countries, Singapore, ukon United Kingdom ang mahimo naman makatinir sa Pilipinas sang visa-free sang tubtub sa 30 ka adlaw.
