Luwas sa katalagman ang kapin 200 ka tawo nga sakay sang isa ka daku nga Indonesia ferry nga nagkalayo samtang nagabyahe ini padulong sa isa ka isla sa northeastern Indonesia.
Suno kay Wisnu Wardana, spokesperson for the sea transportation directorate general, padulong sa isla sang Limafatola kag ginabanta 15 minutos palang nga nakahalin sa Ternate sa North Maluku province ang barko nga KM Karya Indah sang gulpi lang natabo ang sunog.
Sunod nga naglumpat ang mga pasahero kag crew sa tubig.
Suno kay Wardana, na-rescue na ang 181 ka mga pasahero lakip na ang 22 ka kabataan kag 14 ka crew members.
Nagbulig sa rescue operation ang local fishing boats nga yara man sa amo nga dagat sang natabo ang insidente.
Ginpahayag sang mga survivors nga halin sa engine room ang kalayo, apang padayon pa subong ang imbestigasyon agud matumod sang otoridad ang matuod nga ginhalinan sang kalayo.
