ILOILO CITY – Mahimo nga saulugon ang Fiesta Minatay sa bug-os nga bulan sang Nobyembre.
Ini ang gin-athag ni Rev. Fr. Espiridion “Boy” Celis sang Sta. Teresita Del Niño Jesus Parish Church, may kaangtanan sa matuod nga kahulugan sang pagpadulong sa patyo sa tion sang Fiesta Minatay.
Sa interview sang Bombo Radyo kay Celis, iya ginpahayag nga ang matuod nga kahulugan sang Fiesta Minatay amo ang pagpangayo sang indulhensiya agud nga makapalangit ang mga kalag nga yara sa purgatoryo.
Suno kay Celis, ang purgatoryo ang isa ka duog kun sa diin nagatinir ang mga kalag nga wala pa nasintensyahan kun bala makapadulong sa langit ukon sa impiyerno.
Ginpahayag ni Celis nga ang indulhensiya ang maagum lamang paagi sa himpit nga pagpangamuyo kag indi sa mga materyal nga butang nga ginadala sa patyo kasubong sang bulak kag pagkaon.
Kun sang una, gintalana lamang sa Nobyembre 1-8 ang pagpangayo sang indulhensiya plenarya apang sa subong, ang pagsaulog sang Fiesta Minatay ang gintalana sa bug-os nga bulan sang Nobyembre.
Ang indulhensiya suno sa natungdan ang nagaserbe nga ticket sang mga minatay agud nga makalab-ot sa ila destinasyon.
