Isa sa mga ginatudlo nga rason sang halos tinuig nga wildfire sa Indonesia amo ang industrial expansion ukon ang mga forestry concession holders.
Ini ang mga negosyo nga may mga aktibidad nga nagatuga sang tuman ka taas nga environmental risks kaangay sang wildfire.
May kaangtanan ini sa tuman ka lapad nga sunog sa Kalimantan, Indonesia, nga nagtuga na sang dako nga halit sa mga residente kun sa diin nakalab-ot na man ang aso ukon haze sini sa Pilipinas.
Suno kay Bombo International Correspondent Ginavella Limpin Cumla sa Indonesia, padayun nga gina-imbestigaran sang mga awtoridad ang mga aktibidad sang kumpanya nga posible ginhalinan sang kalayo.
Kabahin diri ang mga Palm oil business nga naga-drain sang peatland sa lugar nga ginagamit sa ila produksyon kag nagatuga sang dried peat ukon mala nga mga organic materials sa duta nga mahimo magpasaglab sang kalayo.
Pahayag man ni Cumla, ginaduso man sang mga environmentalists ang mas hugot nga polisa sang gobyerno agud malikawan ang kaangay nga insidente.
Ginpakigbahin niya nga isa ka major disaster ang wildfire subong sa Kalimantan ilabi na nga ginakabig ang lugar bilang lungs of the world bangud sa rainforest sini nga may dako nga papel sa biodiversity kag sa mga endangered species.
