Ginalantaw sang Bangko Sentral ng Pilipinas (BSP) nga maganubo ang inflation rate sa Agusto subong nga tuig nga sulod na liwat sa target range sang gobyerno.
Base sa Month-Ahead Inflation Forecast, ginpahayag sang central bank nga ginapaabot sini nga magtupa ang inflation sa range nga 3.2 tubtub sa 4.0 percent.
Kun matabo, mas manubo ini sa 4.4 percent nga na-rekord sang Hulyo.
“Higher electricity rates and higher prices for agricultural commodities, owing to unfavorable weather conditions, are the primary sources of upward price pressures for the month,” paathag sang BSP.
“These factors are expected to be offset by lower domestic oil prices as well as lower rice, fish and meat prices along with the peso appreciation,” dugang sang bangko.
Ginapaabot man sang bangko nga ang reduction sa taripa sa rice imports ang makabulig man sa pagpahagan-hagan sang inflation.
Natalana nga ipaguwa sang Philippine Statistics Authority (PSA) ang official inflation data para sa Agusto sa Septyembre 5.#
