Ginalantaw sang Bangko Sentral ng Pilipinas (BSP) nga mataas gihapon ang inflation rate sa bulan sang Mayo ilabi na bangud mahal ang balayran sa kuryente kag maluya pa ang balor sang peso.
Posible suno sa bangko nga magasaka ini sa 3.7 to 4.5 percent range nga lapaw sa 2-4% nga target.
Pananglitan magtupa sa 4.5 percent ang inflation, ini na ang mangin pinkamataas sa sulod sang pito ka bulan halin sang nagdangat ini sa 4.9 percent sang Oktubre.
Nahibaluan nga may pagsaka sa trend sang inflation rate sa sulod na sang tatlo ka bulan: 3.4 percent sang Pebrero, 3.7 percent sang Marso kag 3.8 percent sang Abril.
Ginapanan-aw man ni BSP Governor Eli Remolona Jr. nga magalapaw gid man sa two to four percent target sa second quarter antes ini magbalik sa sulod sang target sa third quarter subong nga tuig.
