Ginapanan-aw ni Finance Secretary Benjamin Diokno nga magasarurot ang inflation nga mas manubo pa sa target sang gobyerno sa una nga quarter sang 2024.
Sini lang nga Hunyo sang ginpanubo sang Development Budget Coordination Committee (DBCC) ang panan-awan sini sa inflation sa 2023. Ginhimo ini nga 5% tubtub 6% halin sa una nga estimate nga 5% tubtub 7% nga gin-anunsyo sang Abril.
Ini bangud sa nakit-an nga padayon nga pagnubo sa inflation nga 6.1% sang Mayo halin sa 6.6% sang Abril nga rason kun ngaa nahimo nga 7.5% ang year-to-date rate.
Suno kay Diokno, posible magtupa sa 2%–4% band ang inflation sa fourth quarter subong nga 2023.
Ginpahayag pa sang tiglikom nga naganubo na ang presyo sang produktong petrolyo.
Una na nga ginpahayag sang DBCC nga posible magbalik ang inflation sa target range nga 2% tubtub sa 4% sa 2024 bangud sang ginahimo sang Inter-Agency Committee on Inflation and Market Outlook nga proactive measures agud ma-address ang problema sa nagasinaka nga presyo sang mga balaklon.
