Padayon nga nagataas ang inflation sa Western Visayas subong nga tuig.
Ang inflation amo ang talaksan sang nagataas nga presyo sang goods kag services sa isa ka ekonomiya nga masami nagaresulta sa pagnubo sang purchasing power sang local currency.
Sa interview sang Bombo Radyo kay Miguel Gallego, Statistical Specialist II sang Philippine Statistics Authority, iya ginpahayag nga sang Hulyo nagdangat sa 6.9 percent ang inflation sa Western Visayas halin sa 6.2 percent sang Hunyo.
Suno kay Gallego, ang average inflation humalin sang Enero tubtub Hulyo ang yara sa 5.2 percent.
Ang inflation naman sang Hulyo sang nagligad nga tuig ang mas manubo sang 3.7 percent.
Ang nagapanguna nga rason sa pagsaka sang inflation sa rehiyon amo ang tuigan nga paghulag sang pagkaon kag non-alcoholic beverages index sa 8.7 percent, halin sa 7.3 percent sang Hunyo.
Ini ang ginasundan sang transportasyon nga nagsaka sa 17.3 percent humalin sang 16.5 percent.
Lakip man sa rason sa pagtimbuok sang overall inflation amo ang pagtaas sang furnishings, household equipment kag routine household maintenance index.
Samtang, ang inflation sa tanan naman nga mga probinsya sa Western Visayas ang nagtaas sang Hulyo.
Ang Guimaras ang nakarekord sang pinakamataas nga inflation nga may 8.7 percent, samtang ang Iloilo naman ang pinakanubo nga may 5.3 percent.
Sa duha naman ka mga highly urbanized cities sa rehiyon, ang Iloilo City ang nakarekord sang 8.9 percent kag 4.2 percent naman ang inflation sa Bacolod City.
