ILOILO CITY – Nagpasar sang resolution ang Infrastructure Committee sang Regional Development Council nga nagatuyo nga mapakay-o ang serbisyo sang National Grid Corporation of the Philippines.
Sa ginpatigayon nga special meeting, ang resolution nga unanimously approved sang komitiba amo ang naga-unod sang mga masunod:
-dapat siguraduhon sang National Grid Corporation of the Philippines nga wala na sang may matabo nga domino effect kung may problema sa ila nga grid kag dapat kaayuhon ang protection system,
-pagpasanyog sa kapasidad sang substation kag transmission lines,
-pagbutang sang tatlo ka 100 MVA substation kag transmission lines sa Iloilo City sa 2024, kag
-pagpadasig sa pag-ubra sang Mindoro to Panay line nga nga dapat tapuson sa 2030.
Sa interview sang Bombo Radyo kay Iloilo City Mayor Jerry Treñas, chairman sang komitiba, iya ginpahayag nga may problema ang transmission sang National Grid Corporation of the Philippines.
Dugang pa niya, dapat nga siguraduhon sang transmission service provider nga sa tion nga may problema sa linya sang iban nga distribution facility, indi ma-apektuhan ang syudad kag probinsya sang Iloilo kag mangin ang iban pa nga lugar.
Base sa pahayag sang National Grid Corporation of the Philippines, may problema sa linya sang Central Negros Electric Cooperative kag nag-apekto sa halos bilog nga Western Visayas.
Mangin ang Panay Energy Development Corporation nga isa ka coal-fired plant ang apektado man bangud nga wala sang nagaka-igo nga pasilidad ang operator sang state-owned power grid.
Nagakabalaka man ang alkalde nga liwat nga matabo ang lapnagon nga unscheduled power interruption nga magtuga sang dako nga huol ilabi pa nga madasig ang development sang syudad.
Samtang, subong nga adlaw, natalana kuntani nga magpakigkita si Treñas sa chairman sang National Grid Corporation of the Philippines nga si Anthony Alameda upod ang MORE Electric and Power Corporation apang, nagpositibo ini sa coronavirus disease 2019.
