ILOILO CITY – Nagpatigayon sang pagsinapol subong nga adlaw ang Infrastructure Development Committee sang Regional Development Council VI agud nga hambalan ang update sa Jalaur River Multipurpose Project Stage II, Panay River Basin Integrated Development Project, Cogon Hamulauon Floodway Project kag Ungka II kag Aganan Flyover Projects.
Imbitado sa amo nga pagsinapol ang National Irrigation Administration VI kag Department of Public Works and Highways Region VI.
Sa interview sang Bombo Radyo kay Iloilo City Mayor Jerry Treñas, chairman sang Infrastructure Development Committee sang Regional Development Council VI, iya ginpahayag nga sa amo nga pagsinapol, hibaluon sang council kun ano ang mga masunod nga mga plano sang ahensya ilabi na ang sa Ungka flyover.
Suno kay Mayor Treñas, nakalab-ot na sa iya ang pahayag sang Department of Public Works and Highways Region VI nga wala na sang displacement sa flyover.
Naghagan-hagan naman suno sa iya ang pagpugok sang trapiko sa idalom.
Bangud sini suno sa alkalde, diskusyunan kun bala, mahimo na nga maagyan ang P680 million nga flyover ukon ipatuman ang ‘no touch policy’, ‘look only policy’, ukon ang ‘no contact policy’.
Nagmandu man si Mayor Treñas sa Department of Public Works and Highways Region VI nga maghatag sang regular nga mga updates sa publiko may kaangtanan sa flyover.
Suno sa alkalde, si Assistant Regional Director Engr. Jose Al Fruto ang nakatoka nga maghatag sang updates may kaangtanan sa flyover.
