SARA, ILOILO – Yara na sa Regional Investigation and Detective Management Division ang initial validation tuhoy sa ginapahayag indiscriminate firing nga natabo sa sulod sang Regional Service Training Unit Compound, 2nd Iloilo Provincial Mobile Force Company Headquarters sa Sara, Iloilo kun sa diin naulamid ang isa ka PNP personnel.
Ini ang kasunod sang pagpasa sang initial report sang hepe sang Sara Municipal Police Station nga si Police Major Jose Nemias Pamplona may kaangtanan sa natabo sang Oktubre 8 sang hapon kun sa diin ginapahayag nga nagpalupok si Police Major Terence Paul Sta. Ana nga Assistant Chief sang Regional Learning, Doctrine and Development Division.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ginahibalo pa sa subong kun bala on-duty si Sta. Ana bilang in-charge sang Basic Internal Security Operation Course sang natabo ang insidente kag kun bala ang iya nga pagpalupok sang armas ang kabahin lamang sang training.
Suno kay Malong, isa man sa dapat nga hibaluon amo nga kun nga-a nagpalupok sang armas-luthang si Sta. Ana.
Kadungan sini, gin-athag ni Malong nga indi madali-dali ang pagpasaka sang kaso administratibo bangud nga kinahanglan pa ini nga mag-agi sa maid-id nga proseso.
Sa pagpaathag ni Malong, kabahin sang proseso amo ang pagpatigayon sang review kag imbestigasyon agud mahibalu-an gid ang matuod nga natabo.
Gin-athag man ni Malong nga patas ang pagdesisyon sang kaso nga ginakaulamiran sang opisyal ukon sang Non-Commissioned Officers.
