Nagsuhestyon ang isa ka innovation kag communication consultant sa local nga pamunuan sang Iloilo nga dapat gid pamatian ang tingog sang mga Ilonggo antes maghimo sang bisan ano nga pagbag-o sa patakaran kag dalagan sang Dinagyang Festival.
Sa isa ka interview sa Bombo Radyo, ginpahayag ni Ken Lerona, innovation kag communication consultant, nga ang Dinagyang Festival isa ka pista sang mga Ilonggo bilang pagpasidungog kay Señor Sto. Niño, kag nagakadapat nga mahibaluan ang tagsa ka opinion sang publiko antes maghimo sang mga panibag-o nga mga tikang sa amo nga festival.
Dugang pa niya, ang mga pagbag-o indi dapat pagdaliun kag kinahanglan sang kasugtanan sang tanan nga maapektuhan, ilabi na gid ang ordinaryo nga mga Ilonggo nga nagasaksi kag
naga-suporta sa selebrasyon.
Suno kay Lerona, importante nga balansehon ang kontribusyon sang dalagkuan nga mga sponsors kag ang pag-ulikid sa mga local nga negosyante kag vendors, agud indi sila mabayaan kag masiguro nga ang benepisyo sang festival mag-abot sa tanan nga sektor.
Ginpunto man ni Lerona nga nonpartisan ukon wala sang ginaapitanan ang iya kumento, kag ini ang base lamang sa iya maobserbaran bilang isa man ka Ilonggo.
Ini nga sugilanon nagsugod matapos makabaton sang madamo nga negatibo nga kumento ang pagbag-o nga gin-implementar sa selebrasyon sang Dinagyang Festival, pareho sang wala pagtakod sang banderitas sa bilog nga dalan nga sakop sang selebrasyon, kag ang “no ticket, no entry” policy sa kada judging area nga nagtuga sang pagkadismaya sa madamo nga mga bisita nga wala sang ihibalo sa mga pagbag-o.
