ILOILO CITY – Gindepensahan sang Barangay Kagawad sang Barangay Nonoy, Iloilo City Proper ang iya 16-anyos nga anak nga ginaalegar nadalahig sa pagpangluthang-patay sa isa ka Chinese national sa Iznart St., Iloilo City Proper.
Sa interview sang Bombo Radyo kay Barangay Kagawad Rolando Jaleco, iya ginpahayag nga santo sa panaysayon sang iya 16-anyos nga anak, nahagadan lang siya sang amo nga tion sang isa pa ka suspek nga si Andy Mahinay alyas Hapon, 38-anyos, sang Brgy. Nonoy, City Proper.
Ihado ni Alyas Hapon ang 16-anyos nga anak ni Jaleco.
Suno kay Jaleco, inosente kag wala man naghaom ang iya nga anak nga may krimen nga matabo sang amo nga gab-i.
“Nakibot lang sa ya, nagdalagan lang sya gani sang may naglupok sa punta. Malayo siya ya kay Alyas Hapon,” pahayag ni Jaleco.
Ginpahayag man sang amay nga indi kilala sang ila pamilya ang amo nga Chinese national.
Una na ginpahayag ni Pol. Maj. Francisco Paguia Jr., hepe sang Iloilo City Police Station 1, nga nakit-an sa Closed Circuit Television (CCTV) footage ang menor de edad nga amo ang lookout samtang ginahimo ni Alyas Hapon ang krimen.
Una naman ginpahayag nga pagpanghold-up ang ginalantaw rason sa pagluthang sa amo nga negosyante.
Sa subong, naaresto naman sang kapulisan ang isa pa ka ginatudlo nga suspek nga si Alyas Hapon.
Todo man ang pagpanginwala ni Alyas Hapon nga siya ang nangamot sa krimen. Nagapadayon pa ang imbestigasyon sang otoridad.
