Sa labing-una nga tion sa iya karera sa boksing, nakatilaw si undefeated Japanese superstar Naoya Inoue kun paano maghalok sa canvas sang gintumba ini sang Mexican nga si Luis Nery, apang nagbangon ini, nagbalos, kag tatlo ka beses man nga gintumba ang kasumpong antes dalayon nga nadepensahan ang iya mga titulo sa atubang sang linibu-libo nga boxing fans sa Tokyo Dome sa Japan.
Nagakahulugan ini nga siya man gihapon ang nagapanag-iya sang World Boxing Council (WBC), World Boxing Organization (WBO), World Boxing Association (WBA) kag International Boxing Federation (IBF) belts.
Antes nangin mainit ang sambuwa, matunog ang singgit sang pro-Inoue crowd kag may mga naga-boo naman kay Nery bangud sa iya record sa paggamit sang iligal nga droga sa iya anay mga sambuwa sa amo nga pungsod.
Na-sorpresa ang tanan sang imbukada pa lamang nga round bangud nagtupa ang left straight sang Mexican sa sag-ang sang Japanese rason nga natumba ini kag gin-isipan sang referee.
Sa pagbangon sang 31-anyos nga pound-for-pound star, madasig ini nga naghimo sang adjustments kag gintumba man si Nery sa ikaduha nga round.
Isa pa ka left hook ni Inoue ang nagtumba liwat kay Nery sa ika-lima nga round, apang ang right uppercut-straight combo sini ang nagtapos sang hampang sang natumba pa gid liwat ang Mexican boxer sa ika-anum nga round.
Ang kadalag-an ni Inoue ang nagbatak sang iya nga professional record sa 27-0 kun sa diin 24 diri ang iya ginpangtumba.
Siya ang ikaduha nga undisputed world champion sa duha ka nagkalain-lain nga weights halin sang nagsugod ang four-belt era sang 2004. Ang una nga nakahimo sini amo ang American boxer nga si Terence Crawford.
Ini naman ang ikaduha nga knockout sa karera ni Nery nga nagpanubo sa iya record sa 35-2.#
