CABATUAN, ILOILO- Nagapadayun ang inquest proceedings may kaangtanan sa nagluntad nga kinagamo nga ginkaulamiran sang hepe sang Malay Aklan Municipal Police Station kag sang pakaisa sang iya tiayon sa banwa sang Cabatuan.
Sa interview sang Bombo Radyo kay Police Major Jess Baylon, iya ginpahayag nga wala siya sang intensyon nga patyon si Dennis Baylen nga pakaisa sang iya tiayon kag gintinguhaan pa niya nga istoryahun ang biktima apang padayun sa gihapon ang waras.
Suno kay Baylon, ginsunod man niya ang makabig maximum tolerance bilang isa ka police officer apang sang nagpanghaboy na sang bato kag nagpamilit pa nga magsulod ang biktima, didto na niya ini ginluthang agud malikawan ang mas dako pa nga gamo.
Magapasaka naman sila suno kay Baylon sang kaso nga physical injury, tresspassing kag direct assault samtang magapasaka man sang kaso nga attempted Homicide si Lamberto Baylen nga tiyo sang biktima.
Handa naman siya suno sa natungdan nga nga atubangon kun ano man ang desisyon sang pamilya sang biktima.
Samtang sa interview naman sang Bombo Radyo kay Lamberto Baylen, tiyo sang biktima, iya ginpahayag nga una nagpanggamo si Dennis sa diin ginsaruso siya sini kag ginlampusan sang botelya.
Indi naman siya makabato bangud sa iya edad rason nangayo siya sang bulig kag Baylon agud mag-untat na ang komusyon apang nagpanghaboy pa sang bato ang biktima sa diin naigo ang tiayon sang hepe kag nalipong ini.
Samtang, sa interview naman sang Bombo Radyo kay Dennis Baylen, iya ginpahayag nga wala siya nakahibalo kun ano na ang nagkalatabo bangud man sa iya kahulugbon.
Suno kay Baylen, Ang nadumduman lang niya amo nga naga-inom-inom sila kag nahubog siya.
Pahayag pa niya wala siya nakadumdum nga natiruhan siya sang hepe bangud sa iya ginhimo.
Nahibaluan nga nagluntad ang nasambit nga komusyon sa birthday party sang anak ni Police Major Baylon sa diin nagpanggamo si Dennis Baylen kag nagpanghaboy sang bato sa balay sang hepe.
Pagkatapos sang insidente, boluntaryo man nga ginpresenta ni Baylon ang iya kaugalingon sa Cabatuan Municipal Police station lakip na ang pagturn over sang iya service firearm.
Magapasaka naman sang kaso batok sa hepe ang pamilya ni Baylen
