ILOILO CITY – Wala sang may nabaton nga kopya sang written complaint si Local Civil Registry Head Mr. Juncae Manikan tuhoy sa ginapahayag 180 ka peke nga kasal nga ginrehistrito sa nasambit nga talatapan.
Ini ang kasunod sang ginpatigayon nga pagsinapol nga gintambungan ni Manikan, pila ka empleyado sang Local Civil Registry kag sang National Bureau of Investigation.
Sa interview sang Bombo Radyo kay Manikan, iya ginpahayag nga nakabaton lang siya sang kopya sang subpeona tuhoy sa mga peke nga kasal nga ginreklamo sang isa ka preso.
Suno kay Manikan, kun tani hatagan man sila sang kopya sang written complaint agud nga makahanda man sila sang ila rebuttal.
Ini bangud nga suno kay Manikan, ginlapas sang tagreklamo ang data privacy act ilabi pa nga wala sang pahanugot ang pagpaguwa sang Inventory of Marriage.
Sa pihak sini, ginpahayag sang natungdan nga iya nga ginatahod ang desisyon sang Natinal Bureau of Investigation kag nagpahayag sang kahandaan sa ginapatigayon nga imbestigasyon.
Samtang, ginatugyan naman ni Iloilo City Mayor Jerry Treñas sa City Legal Office ang pag-usisa tuhoy sa 180 ka peke nga mga kasal.
Sa interview sang Bombo Radyo kay Treñas, iya ginpahayag nga nagakadapat nga mausisa kun bala matuod ang reklamo sang isa ka preso nga may yara sang peke nga kasal nga ginparehistro sa Local Civil Registry.
Magluwas diri, ginpahayag ni Treñas nga ginatugyan man niya sa City Legal Office ang pag-usisa sa reklamo nga electioneering batok sa tatlo ka mga regular employee sang Iloilo City Hall.
