ILOILO CITY – Nag-umpisa na subong nga gab-i ang random inspection sa tagsa ka commercial establishment kadungan sang pagdula sang Liquor ban sa syudad sang Iloilo.
Sa interview sang Bombo Radyo kay Mr. Jeck Conlu, pinuno sang Public Safety and Transportation and Management Office, iya ginpahayag nga 9:00 subong nga gab-i, nag-umpisa ang random inspection sang joint inspection team nga ginalakipan sang Business Permit and Licensing Office, Public Safety and Transportation Management Office, Philippine National Police, Transportation Management and Traffic Regulation Office, Iloilo City Anti-Smoking Task Force kag Task Force on Moral Values Formation.
Suno kay Conlu, wala na sang extension ang plaso nga ginhatag sa tagsa ka bar owner agud nga magtuman sa ginpaguwa nga pagsulundan.
Ginpahayag ni Conlu nga sa tion nga may maglapas sa pagsulundan, gilayon nga magahimu sang report ang joint inspection team kag ini ang igapasa sa Office of the City Mayor.
Mas makapaayo man suno kay Conlu kun ipa-blotter ang unruly customers ukon ang mga masami nga nagama-oy sa bar agud nga mahapos para sa joint inspection tream ang pagtumod kun sanday sin-o ang ilakip sa blacklist.
Sa subong suno sa natungdan, One Strike Policy ang ipatuman sa diin ang magalapas sa pagsulundan ang bawi-an sang permit to operate.
Nahibaluan nga dapat may yara sang bouncer ukon security personnel ang tagsa ka bar, hugot nga pagrikisa sa customers, may functional nga Closed Circuit Television cameras sa sulod sang commercial establishment, pagdumili sa pagbaligya sang makahulubog nga ilimnon sa mga minor de edad kag amo man sa mga tuman na kahubog nga customer kag pagdumili sa pagbaligya sang illegal drugs kag sigarilyo.
