ILOILO CITY- Nagapadayun ang inspection sang Public Safety and Transportation Management Office, Philippine National Police kag sang Task Force on Moral Values Formation sa bars sa palibot sang syudad sang Iloilo agud hibaluon kun bala ginasunod ang guidelines sang Executive Order 46.
Sa interview sang Bombo Radyo kay Mr. Nestor Canong, pinuno sang Task Force on Moral Values Formation, padayun ang ila ginahimo nga monitoring sa bars, restobars kag iban pa nga mga balay ilimnan.
Suno kay Canong, sa ila paglibot, ila nakit-an nga ginasunod man sang bar owners ang tagsa ka guidelines sang Executive Order 46.
Kun may yara sang bars nga may buron nga Close Circuit Television camera, ila gina abisuhan nga ilisan sang mas klaro agud mas madasig nga makit-an kun ano ang nagakatabo.
Nahibaluan nga lakip sa guidelines nga dapat sundon kadungan sang pagdula sang Liquor ban amo ang hugot nga pagpatigayun sang body frisking, may yara sang bouncer ang isa ka bar, may functional nga Closed Circuit Television camera, wala sang menor de edad nga nagasulod, indi pagserbe sang makahulubog nga ilimnon sa mga menor de edad lakip na ang pagsaway sa mga customer nga tuman na kahubog.
