ILOILO CITY – Daku ang risgo sang pagbakal sang eyeglasses kag contact lenses sa online ukon sa indi lisensyado nga eye specialist.
Ini ang paandam sang Integrated Philippine Association of Optometrists, Inc. ilabi na subong nga madata ang online selling bangud sa pandemya.
Sa pagpaathag ni Dr. Irene Peliño, Board of Examiner in Optometry sang Professional Regulation Commission, sa baylo nga makabulig, mahimo pa nga makapalala sang damaged sa mata ang ginabakal nga eyewear nga ginabaligya online ukon sa indi lisensyado nga eye specialist.
Suno kay Dr. Peliño, ang mga eyewear nga ginabaligya sa online ang wala sang protection batok sa Bluelight kag Ultraviolet light nga makatuga sang eye damage.
Ginpahayag ni Dr. Peliño nga ang Bluelight ang wave gikan sa cellphone, computer, tablets kag iban pa nga Light-Emitting Diode (LED) gadgets kun sa diin ang madugay nga exposure ang mahimo magtuga sang retinal damage kag age-related macular degeneration nga nagaresulta sa pagkabulag.
Ang tuman nga exposure naman sa Bluelight suno kay Dr. Peliño ang mahimo man nga makatuga sang insomia samtang ang exposure sa Ultraviolet Radiation nga gikan sa sunlight ang mahimo magresulta sa Cataracts paagi sa pag-damage sang living tissue sa mata.
Ang lens nga gina-prescribe sang eye specialist suno sa natungdan ang may yara sang protective coat depende sa ginakinahanglan sang pasyente kag ini ang ginahimo sang maid-id sa laboratoryo.
Agud nga makalikaw sa risgo, ginapanugyan nga magpakunsulta sa eye specialist kasubong sang ophthalmologist kag optometrists.
