ILOILO CITY – Gin-athag sang Intellectual Property Region 6 ang isyu sa Iloilo Dinagyang Foundation Incorportated sa pagrehistro sang “Iloilo Dinagyang Festival” bilang trademark nila.
Sa interview sang Bombo Radyo kay Marianne Tajanlangit-Bebit, Intellectual Property Field Operations Specialist Region 6, iya ginpahayag nga ang ginatumod nga “Iloilo Dinagyang Festival” nga gintrademark sang Iloilo Dinagyang Foundation Incorportated amo ang kombinasyon sang mga tinaga nga may upod nga design, font style, kag lay out sang logo.
Suno kay Bebit, ang indi mahimo nga i-trademark amo ang mga generic name ukon mga kumon nga pangalan.
Gin-athag man niya nga mahimo gamiton ang mga tinaga nga “ILOILO DINAGYANG FESTIVAL” apang ang desinyo sini nga gin trademark sang Iloilo Dinagyang Foundation Incorporated ang hugot nga ginadumilian nga gamiton.
Ang desinyo sang “ILOILO DINAGYANG FESTIVAL” ang ginaprotektahan lamang rason nga gintrademark ini sang nasambit nga foundation.
Dugang pa sang natungdan, kun sundon ang estilo ukon design sang “ILOILO DINAGYANG FESTIVAL” posible ini nga mareklamo.
