ILOILO CITY – Nagakadapat nga pasangkaron sang Iloilo City Police Office ang intelligence network agud nga madali nga masolbar ang mga krimen sa syudad sang Iloilo.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga ang intelligence network ang daku nga factor sa pagsolbar sang krimen nga nagakatabo.
Suno kay Defensor, indi lang ang motorcycle riding suspects ang ginasentrohan sang mga imbestigador kundi lakip na ang tanan nga sahi sang krimen.
May kaangtanan diri, ginpahayag ni Defensor nga iya nga ginasapol ang tanan nga imbestigador agud nga ipahibalo nga dapat may yara sang update ang kaso ilabi na kun riding-in-tandem incidents ang pagahambalan.
Isa man sa ginaplano sang Iloilo City Police Office Director amo nga dugangan ang mga pulis sa syudad sang Iloilo agud nga malab-ot ang ideal police-population ratio.
