Nagapati ang chairman sang Committee on Health sa Iloilo City Council nga sa baylo nga magpatuman sang mga ‘no vaccine, no ride’ policy ukon anuman nga kaangay nga polisa nga naga-obligar ukon nagapwersa sa tawo nga magpabakuna, mas importante nga i-intensify na lang ang Covid-19 vaccination sa syudad.
Ang Iloilo City nga amo ang regional center sa Western Visayas amo na ang isa sa may pinakamataas nga inoculation rate sa guwa sang National Capital Region (NCR).
Sang nagligad lang nga semana, nagpahayag ang Committee on Transportation sa konseho nga iduso ang ‘no vaccination, no ride’ policy sa mga tricycle units agud masigurado pa gid ang welfare kag safety sang mga driver kag pasahero.
Sa interview sang Bombo Radyo kay Councilor Allan Zaldivar, chair sang Committee on Health, iya ginpahayag nga madamo pa ini sang kinahanglan ikonsiderar kaangay sang emergency cases ukon ang mga ginadalian dal-on sa ospital.
Sa bahin sang konsehal, mas maayo nga pabaskugon na lang ang kampanya agud nga “mapasakay ang tanan, indi mangin discriminatory, kag malikawan nga malapakan ang kinamatarong sang iban.”
Ginapanan-aw man nga mabuhinan pa ang income sang mga driver kun pilion pa gid ang mga fully-vaccinated nga mga pasahero.
Nagpasalig ang konsehal nga tun-an man ini sang maayo sang konseho sa tion nga iduso na gid sang amo nga komitiba.
