ILOILO CITY– Nagpatigayon sang “Inter-Agency Dialogue on Guimaras Tourism” ang Department of Tourism.
Ini ang kasunod sang natabo nga Iloilo Strait tragedy sa diin 31 ang napatay matapos nagkulob ang tatlo ka mga pump boat sang Agusto 3, 2019.
Ang inter-agency dialogue ang ginpangunahan ni Atty. Helen Catalbas, Regional Director sang Department of Tourism Region 6.
Nangin dinapit man nga bisita sa kahiwatan si Guimaras Gov. Samuel Gumarin sa diin ginplastar niya ang Guimaras Tourism Before and After August 3, 2019.
Ginplastar man ang Tourism Related Problems sang Guimaras Province and Municipalities, Tour Operators, Sea transport, Hotel/Restaurant/Resort, Guimaras State University kag Senior Citizen Sector.
Lakip man sa nagplastar sa Tourism Related Problems amo ang Department of Tourism, Maritime Industry Authority, Philippine Coast Guard, Philippine Ports Authority, Hugpong Guimarasnon, Sea Transport kag Probinsya sang Guimaras.
Sa exclusive interview sang Bombo Radyo kay Gumarin, iya ginpahayag nga pinaagi sa nasambit nga dayalogo, mahatagan sang kasolbaran kag solusyon ang problema nga nagtuhaw kasunod sang Iloilo Strait tragedy.
Nangin tensyonado man ang dayalogo matapos nga naistoryahan ang ginpagwa nga Memorandum sang Maritime Industry Authority sa diin ginadumilian nga magbiyahe ang pump boat pagpatak sang 6:00 sa gabi.
Gin-athag ni Guimaras Vice Gov. John Edward Gando nga naghingyo na sila sa Maritime Industry Authority nga pasugtan nga magbiyahe ang mga pump boat kun may yara sang emerhensya agud mahapos ang pagtransport sang mga pasyente.
