ILOILO CITY – Nag-abot na sa Iloilo City si Major General Melquiades Feliciano nga nagaserbe bilang Deputy Chief Implementor sang Inter Agency Task Force sa Cebu.
Sa exclusive interview sang Bombo Radyo kay Mr. Jeck Conlu, tagpamaba sang COVID Team sang Iloilo City Government, iya ginpahayag nga nagapanguna nga katuyuan ni Feliciano sa pagpadulong sa Iloilo amo nga ipatuman ang mga tikang nga ila ginhimo sa Cebu sa pagtapna sa pagtaas sang kaso sang COVID-19.
Suno kay Conlu, dako ang mabulig ni Feliciano sa diin mas mahapos nga mapalab-ot sa national government ang kinahanglanon sang syudad.
Magapungko man si Feliciano sa emergency operations center sa syudad kaupod ang COVID Team kag si Office of the Presidential Assistant for the Visayas Assistant Secretary Jonji Gonzales.
Magluwas sa Iloilo City, magapadulong man si Feliciano sa Bacolod City.
