Opisyal na nga ginpirmahan ni Iloilo City Mayor Raisa Treñas ang UNA Credit Access for Resilient Enterprises (CAREs) Ordinance nga magahatag sang oportunidad sa mga kwalipikado nga nano entrepreneurs nga makakuha sang interest-free loan nga nagabalor halin P5,000 tubtob P100,000.
Paagi sa sini nga programa, ginalauman nga makabulig ang lokal nga gobyerno sa mga gagmay nga negosyante nga nagakinahanglan sang dugang nga kapital agud makasugod, makapadayon kag mapalapad ang ila mga negosyo.
Lakip sa mga ginatuyo sang ordinansa nga mahatagan sang mas accessible nga financial assistance ang mga nano entrepreneurs nga wala sang collateral ukon credit history kag wala sang masaligan nga source sang kapital.
Kabahin man sang programa ang paghatag sang business training, financial literacy kag mentoring agud mas mapauswag ang kapasidad sang mga benepisyaryo sa pagdumala sang ila negosyo.
Suno kay Treñas, isa ini sa mga inisyatibo nga iya ginpangunahan agud mabuligan ang mga Ilonggo nga may yara na sang negosyo ukon nagahandom nga magpatukod sang ila kaugalingon nga pangabuhi apang limitado ang kapital.
Pahayag sang alkalde, pinaagi sa UNA CAREs Program, luyag sini nga mahatagan sang alternatibo ang mga gagmay nga negosyante agud indi na sila mapilitan nga magpanghulam sa mga informal moneylenders nga nagapatuman sang mataas nga interes.
Ginpahayag man ni Treñas nga matapos ang pagpirma sa ordinansa, masugdan na ang kinahanglanon nga preparasyon para sa implementasyon agud sa labing madali nga tion mahatag ang bulig sa mga Ilonggo entrepreneurs.
Ginpasalamatan man sang alkalde si City Councilor Rudolph Jeffrey Ganzon kag ang mga katapo sang Iloilo City Council sa pagsuporta sa amo nga inisyatibo sang administrasyon.
Madumduman nga ang nasambit nga ordinansa gin-aprubahan sang Iloilo City Council sang Nobyembre 4, 2026, nga may yara sang inisyal nga P3 million nga seed fund ang programa, nga pagadugangan pa paagi sa annual budget appropriations, grants, donor contributions kag loan repayments.
Text by: Bombo Cyrene A. Nasis
