Magahulag ang organisasyon sang Christian churches sa Pilipinas agud i-monitor ang implementasyon sang pagdumili sa Philippine offshore gaming operators ukon mga POGO.
Sandig sa report sang Catholic Bishops’ Conference of the Philippines (CBCP), nagpabutyag ang Philippine Interfaith Movement Against Human Trafficking (PIMAHT) nga kinahanglan gid nga i-address ang kaangtanan sini nga Chinese-run offshore gaming operations sa mga nagakatabo nga human trafficking.
Suno kay CBCP assistant secretary general Bryant Restituto, matapos nagmandu si President Ferdinand Marcos, Jr. nga i-shutdown na ang mga POGO, dapat man nga i-address sang gobyerno ang isyu sa mga kabataan nga mabilin sang POGO employees nga iga-deport sa Pilipinas.
“As a network, it [PIMAHT] will become a watchdog to the progress of these directives,” pahayag ni Restituto.
Ang PIMAHT ginabug-usan sang mga tiglawas halin sa CBCP, National Council of Churches in the Philippines kag Philippine Council of Evangelical Churches (PCEC).
Sang damlag lang, 100 ka mga tiglawas halin sa mga simbahan, mga ahensya sang gobyerno, faith-based organizations kag advocates halin sa Southeast Asia ang nagtipon sa Manila para sa “Freedom Forum Asia” nga nag-partner sa Walk Free Global Freedom Network.
Nobyembre 8 sang pormal nga nagmandu si President Marcos sa pag-ban sa mga POGO. Antes sini, na-anunsyo na niya ang amo nga direktiba kadungan sang iya State of the Nation Address ukon SONA sang Hulyo.
