ILOILO CITY – Welcome development para sa militar ang interim joint ceasefire nga ginkasugtan sang gobyerno kag sang National Democratic Front (NDF) sa ginapatigayon nga peace talks sa Netherlands.
Sa interview sang Bombo Radyo Iloilo, ginpahayag ni Lt. Col. Ray Tiongson, spokesman sang Philippine Army, dako nga butang ini sa kampanya sang militar kag gobyerno para sa kalinungan.
Apang ginpahayag ni Tiongson nga ila pa ginahulat ang guidelines para sa nasambit nga kasugtanan.
Gin-athag pa sang Philippine Army spokesman nga ang nasambit nga agreement ang indi basehan sang permanente nga ceasefire kundi kasugtanan nga padayon nga magatrabaho ang gobyerno kag ang komunista nga grupo para sa permanent ceasefire.
Kadungan sini, ginpahayag ni Lt. Col. Tiongson nga magapadayon ang operasyon sang Philippine Army tubtob nga wala sang guidelines kag pinal nga kasugtanan.
Nag-apelar man ang militar sa New People’s Army nga armed-wing sang NDF, nga seryosohon ang peace negotiation kag untatan na ang kalakasan.