ILOILO CITY – Natunga sa tatlo ka kategorya ang preventive measures nga dapat ipatuman sa tagsa ka opisina kadungan sang pagbalik sang trabaho.
Sa interview sang Bombo Radyo kay Niezel Sabrido, tagpamaba sang Department of Labor and Employment 6, iya ginpahayag nga may yara sang interim guidelines nga dapat sundon bilang preventive measures batok sa Coronavirus Disease 2019 (COVID-19).
Suno kay Sabrido, dapat nga may yara sang guidelines nga dapat sundon antes magsulod, kun yara sa sulod kag kun may yara na sang suspected COVID-19 case.
Lakip diri suno kay Sabrido amo ang pag check sang body temperature sang empleyado, pagasuksok sang face mask samtang nagatrabaho, sundon ang 1-meter nga physical distancing kag kun mahimo ipaagi na lang sa teleconference ang pagsinapol kag likawan anay ang dululungan nga pagkaon.
Samtang yara sa sulod sang opisina, nagakadapat nga ipabilin ang katinlo paagi sa paghugas sang kamot, paggamit sang disinfectant kag mas makapaayo nga may yara sang health checklist form ang tagsa ka empleyado agud nga mahibalu-an kun bala may yara sang ginabatyag nga balatian.
Para naman sa Personal Protective Equipment kasubong sang face mask kag gloves, ang employer na ang dapat nga magbakal sini para sa mga empleyado.
