ILOILO CITY- Ginmando ni Iloilo City Mayor Jerry Treñas nga magpatigayon sang internal audit sa tanan nga opisina sa Iloilo City hall.
Ini ang kasunod sang natukiban nga mga kwestiyonable kag mahimo i-suspend nga mga procured items sang syudad.
Sa interview sang Bombo Radyo kay Mayor Treñas, iya ginpahayag nga kinahanglan nga mapasiguro nga magpatigayon sang internal audit lakip na sa performance sang mga empleyado bangud base sa partial audit report sang Commission on Audit sa bulan sang Enero tubtob Hunyo, nagagwa nga ang mga salakyan nga ginagamit sang Public Safety and Transportation Management Office ang may yara sang suspension.
Magluwas diri, kwestiyonable man suno sa alkalde kag wala ginapahanugutan sang Department of Interior and Local Government ang pagbakal sang pick-up para sa syudad.
Nakit-an man suno sa iya nga ang purchases ni anay Iloilo City Mayor Jose Espinosa III, anay City Administrator Atty. Hernando Galvez, anay pinuno sang City Engineer’s Office nga si Engr. Bobby Divinagracia kag iban pa ang kwestiyonable kag may yara naman sang suspension order.
Gindugang pa ni Treñas, isa pa gid sa mga rason nga luyag niya magpatigayon sang audit sa mga talatapan sa Iloilo City Hall amo ang ginaalegar peke nga mga transaksyon sa Local Civil Registry office kag bangud pa gid sa bag-o nga mga complaint batok kay Juncae Manikan nga ginpalab-ot sa alkalde.
Ini ang kabangdanan nga nagpapanaog ang Office of the City Administrator sang Memorandum Order sa pagpa-audit sa Local Civil Registry.
