ILOILO – Ginpatemprano sang airline company nga Cebu Pacific Air ang travel cancellation padulong sa Hong Kong kasunod sang hingyo ni Iloilo. Gov. Arthur Defensor Jr. agud nga matapna ang paglapta sang Novel Coronavirus.
Sa interview sang Bombo Radyo kay Art Parreño, Civil Aviation Authority of the Philippines Iloilo Terminal Supervisor, iya ginpahayag nga sa baylo nga mag-umpisa ang travel cancelation sa Pebrero 7, ini ang maga-umpisa sa Pebrero 4.
Suno kay Parreño, magalawig tubtub sa Marso 29 ang travel cancelation sa Hong Kong apang indi naman apektado ang byahe padulong sa Singapore.
Ginpahayag ni Parreño nga ang mga pasahero nga nakabakal na sang ticket ang ginpadal-an na sang abiso paagi sa text message kag e-mail.
May yara sang tatlo ka options ang mga pasahero nga ginalakipan sang flight rebooking, pag-refund sang bayad kag mahimo man nga himuon na lang nga travel fund ang kwarta nga ginbayad.
