Ginreport sang World Bank nga naga-igod gihapon ang Pilipinas ipaanggid sa iban nga Southeast Asian countries kun internet connectivity ang pagahambalan.
Sa ‘Better Internet for All Filipinos’ 2024 report, nakasaad nga ang internet sa Pilipinas ang naga-lag sa affordability kag speed kag access rason nga indi man patas ang digital participation. Bangud sini, ginalantaw nga nagakabalabagan ang digital potential sang mga tawo kag mga negosyo — isa ka “growth opportunity” nga nawasi sang mga Pinoy.
Sa fixed broadband, halimbawa, ang average speed sa Pilipinas ang yara lamang sa 92Mbps — mas manubo sa 264Mbps sa Singapore, 216Mbps sang Thailand, 112Mbps sang Malaysia, 105Mbps sang Vietnam, kag 94Mbps sang Brunei.
Ang mas manubo naman nga speeds amo ang iya sang Indonesia, Laos, Cambodia, kag Myanmar.
Yara naman sa 33% ang penetration sang fixed broadband access sa Pilipinas nga mas manubo sa 111 percent sa Singapore, 108 percent sa Brunei, 76 percent sa Vietnam, 58 percent sa Thailand, kag 50 percent sa Malaysia.
Apang kun presyo sang fixed broadband ang pagahambalan, pinakamataas sa rehiyon ang Pilipinas nga yara sa 11.3 percent sang gross national income (GNI) per capita.
Ang mobile broadband figures ang nag-report sang kaangay man nga rankings kun sa diin ang Pilipinas ang may pinakamahinay nga mobile download speed apang mas mahal ipaanggid sa iban nga mga pungsod sa Southeast Asia.
Una na nga ginpahayag ni Department of Information and Communication Technology (DICT) Secretary Ivan John Uy nga naga-implementar na ang ahensya sang nagkalain-lain nga mga programa agud nga madala ang libre nga internet connectivity sa nabaw-ing nga mga lugar.#
