Nagpagguwa sang red notice ang Interpol batok kay Ronalyn Baterna, corporate secretary sang Philippine Offshore Gaming Operations (POGO) firm Lucky South 99.
Ini suno sa Presidential Anti-Organized Crime Commission (PAOCC).
Ginpahayag ni PAOCC spokesperson Winston Casio sa isa ka Kapihan sa Quezon City press conference nga nakabaton ang Pilipinas sang red notice sang Oktubre 13 kag ginpasa sa ila opisina sang nagligad nga semana.
Lakip man sa red notice si Cassandra “Cassie” Li Ong, representative sang Lucky South 99, nga ulihi nasiplatan sa Japan.
Ang duha ka opisyal ang may arrest warrants para sa qualified human trafficking angot sa ginapahayag nga sacm hub sang Lucky South 99 sa Porac, Pampanga, sa diin nakaluwas ang 158 ka foreign employees matapos matukiban ang ebidensya sang torture, kidnapping, kag sex trafficking.
Suno kay Casio, makig-angot ang PAOCC sa Department of Justice kag National Bureau of Investigation agud magbuligay sa ila foreign counterparts para sa pag-aresto kay Baterna kag Ong.
Matandaan nga una na nga ginpanginwala sang Lucky South 99 ang mga alegasyon.
Sang nagligad nga hearing sa House Quad Committee, gin-ako ni Baterna nga nag-isyu siya sang mga cheque sa mga kliyente sang kompaniya nga ang pinakadako nga kantidad amo ang P500,000 kag halin ang kwarta kay Ong.
