Ginkuha sang isa ka International Company nga naga-develop sang bakuna batok sa COVID-19 ang pila ka mga doktor sa Iloilo Province agud magpatigayon sang clinical trial.
Ang gina-manufacture sang China nga Walvax Vaccine ang may similaridad sa Pfizer kag Moderna COVID-19 vaccine sa diin two doses man ang kinahanglan nga itublok sa isa ka indibidwal.
Sa interview sang Bombo Radyo kay Dr. Louie Tirador, iya ginpahayag nga aprubado na sang United States Food and Drug Administration(USFDA) ang gina-develop nga Walvax vaccine kag natapos naman ang first kag second phase sang clinical trial para diri.
Ang third phase ang pagahimuon sa Pilipinas.
10 ka mga lugar ang ginpili sa pungsod kag nalakip diri ang Iloilo Province sa diin isa ang cardiologist nga si Dr. Tirador sa napilian nga magpatigayon sang phase three clinical trial.
Suno sa doktor, diri na matumod ang efficacy ukon ang ka-epektibo kag safety sang bakuna antes ini ipaggwa sa mga merkado.
”Voluntary” lang suno sa iya ang patigayunon nga clinical trial para sa mga participants nga naga-edad 18 anyos pasaka, wala history sang balatian nga COVID-19 kag wala nagabusong.
Ang mga participants ang pagahatagan man sang incentives, libre nga konsultasyon kag insurance.
Ginalauman nga magaumpisa ini sa bulan sang Oktubre.
