ILOILO– Nag-abot na sa Iloilo ang investigation team sang Maritime Industry Auhtority agud magpatigayon sang imbestigasyon may kaangtanan sa tatlo ka pumpboat nga nagkulob sa tunga sang kalalawran sang IloIlo kag Guimaras.
Sa interview sang Bombo Radyo kay Engr. Rowel Pador, Senior Shipping Operations Specialist sang Maritime Industry Auhtority, iya ginpahayag nga nag-umpisa na subong nga adlaw ang imbestigasyon sa nasambit nga insidente.
Suno kay Pador, usisaon kun nga-a tatlo gid ka pumpboat ang nagkulob kag hibaluon kun nga-a ginpahanugutan sang Philippine Coast Guard-Iloilo nga magbiyahe ang mga pumpboat bisan malain ang tiyempo.
Madumduman nga magkasunod nga nagkulob ang tatlo ka pumpboat sang Agosto 3, Sabado kun sa diin una nga nagkulob ang MB Chi-chi kag MB Keziah 2 kag sunod naman nga nagkapan ang MB Jenny Vince.
Ang MB Chi-Chi kag Keziah 2 ang halin sa syudad sang Iloilo kag padulong sa Jordan, Guimaras sang natabo ang insidente kag halin sa Buenavista, Guimaras kag padulong sa syudad sang Iloilo ang MB Jenny Vince.
Sa subong, padayon sa gihapon ang search and retrieval operations sa mga nabilin nga missing.
