TIGBAUAN, ILOILO – May pinasahi nga pamaagi ang mga pamatan-on sa banwa sang Tigbauan, Iloilo agud maka-income subong nga may COVID-19 pandemic.
Sa interview sang Bombo Radyo kay Adrian Camposagrado, youth leader kag mental health advocate, iya ginpahayag nga Agusto sang naisipan nila nga mga myembro sang The Estrawng Heroes nga mag-organisa sang ‘Ipalihug Kay Manong’.
Suno kay Camposagrado, ang mga nagabug-os sa ‘Ipalihug Kay Manong’ amo ang mga kabataan nga trisikad driver sa diin kalabanan sa mga ini ang may pamilya na sa lamharon nga edad.
Ginpahayag sang natungdan nga pinaagi sa sini nga trabaho, nahatagan sang kahigayunan ang mga kabataan nga trisikad driver nga maka-angkon ang palangitan-an kag indi makabatyag sang kasubo ilabi na subong nga may pandemya.
Ginapasigurado man sang natungdan nga kumpleto sa Personal Protective Equipment (PPE) ang mga trisikad driver nga nagabug-os sa ‘Ipalihug Kay Manong’.
Pinaagi sa ‘Ipalihug Kay Manong’, mahimo na nga ipalihog ang pagpaninda, pagbayad sang kuryente, kag iban pa.
Matandaan nga sang damlag lang, gindayaw sang Sangguniang Bayan sang Tigbauan, Iloilo ang ‘Ipalihug Kay Manong’ pinaagi sa resolusyon nga ginpangunahan ni Sangguniang Kabataan Federation President Dyossa Marie Terunez.
Samtang, nagpanugyan man si Camposagrado nga likawan ang pagpakanubo sa mga tawo kag paghambal nga wala siya sang pulos ilabi na subong nga pandemya.
Subong nga may pandemic suno sa natungdan, nagakadapat nga magsuporta sa iban nga tawo kag dayawon man ang ila hinimuan ukon magtanyag sang anuman nga bulig.
