𝗜𝗟𝗢𝗜𝗟𝗢 — Nag-issue sang ‘Blue Alert Status’ ang Iloilo Provincial Disaster Risk Reduction and Management Council (IPDRRMC) kasunod sang nagapanglakaak nga kaso sang dengue sa Iloilo.
Sa interview sang Bombo Radyo kay Retired Colonel Cornelio Salinas, head sang Iloilo Provincial Disaster Risk Reduction and Management Office, iya ginpahayag nga ang status ang magatulod sa mga member council agud nga i-monitor ang level of incidents sang mga dengue cases sa ila tagsa ka nasakopan nga lugar.
Suno kay Salinas, lakip sa maga-monitor sa kaso sang dengue amo ang response clusters, health sectors, kag mga ospital agud matumod ang numero sang mga pasyente kag kon masarangan ini nga ma-cater sang mga ospital.
Ginpahayag man sini nga ang mayor nga rolyo sang talatapan amo ang magtipon sang tanan nga records hali sa mga Local Disaster Risk Reduction and Management Council sang probinsya.
Mangin palaagyan man ini agud matul-id ang nagakalatabo ‘on ground’ kon nagataas bala ukon naganubo ang kaso sang makamamatay nga dengue.
Hugot man nga ipatuman sang talatapan ang mga interventions nga makabulig sa paghagan-hagan sang dengue cases.
Lakip diri ang 4S strategy batok sa dengue: Search and destroy breeding places; Secure self-protection; Seek early consultation; kag Support fogging or spraying in hotspot areas.
Nahibaluan nga pinaka-latest nga record, nabalhag sang Department of Health Western Visayas ang 3,914 ka mga kaso sang dengue sa Iloilo.
