𝗜𝗟𝗢𝗜𝗟𝗢 — Ginaduso sang Iloilo Provincial Health Office (IPHO) nga magpakigbahin ang tagsa ka pamilya sa family planning program agud nga malab-ot ang target nga numero sang kabataan.
Sa interview sang Bombo Radyo kay Dr. Rodney Labis, Health Officer 1 sang Iloilo Provincial Health Office, iya ginpahayag nga ini nga programa ang may tinutuyo nga mabuligan ang isa ka pamilya agud nga magplano kag mahatagan sang proper spacing sa gina-target nga kabataan.
Suno kay Labis, mas makapamaayo nga may plano kag organisado ang pagpamata agud man nga matutokan ang kabataan kag mahatag ang mga kinahanglanon sa sulod sang panimalay.
Ginpahayag man sini nga ginasigurado sang ila talatapan nga ang kada rural health unit sa Iloilo ang may yara sang family planning service provider agud mahatagan sang paggiya ang isa ka babaye ukon pamilya.
Gin-athag man sini nga nagabakal ang Department of Health (DOH) sang family planning commodities agud nga mahatag sang libre sa mga pamilya nga nagakinahanglan sini.
