ILOILO CITY – Ginkalipay sang Iloilo Provincial Health Office ang pagdeklarar sang World Health Organization nga indi na isa ka global health emergency ang coronavirus disease 2019.
Sa interview sang Bombo Radyo kay Dr. Maria Socorro Quiñon, pinuno sang opisina, iya ginpahayag nga nadula na ang kakulba sang publiko sa mataas nga mortality rate sang balatian.
Sa subong suno sa natungdan, nag-amat-amat na nubo ang mortality rate bangud nga madamo na ang nagpabakuna.
Amo man ini ang rason suno kay Quiñon kun ngaa nga ginpaidalom sa alert level 1 ang probinsya sang Iloilo.
Apang, nagpaandam man ini sa publiko nga ang coronavirus disease 2019 ang yara sa gihapon base man sa pahayag ni World Health Organization director-general Tedros Adhanom Ghebreyesus.
Base sa data sang Iloilo Provincial Health Office, naga-amat-amat naman nga nagasaka ang kaso sang coronavirus disease 2019.
Sa sulod sang duha ka semana, nagsaka sa 154 ang kaso halin sa masobra 70 cases nga na-record sa nagligad nga tatlo tubtob apat ka semana.
Sa probinsya man sang Iloilo na-record ang pinakauna nga kaso sang Arcturus variant.
Bangud sini, nagpanawagan si Quiñon sa publiko nga magpabakuna bangud nga mataas ang risgo nga mapatay sa tion nga indi pa bakunado.
Gina-enganyo man sini ang mga senior citizens kag mga persons with comorbidities nga magpabakuna kag ang mga naga-edad 18 anyos kag pasaka nga mag-avail na sang booster shot.
