Nagpahanumdom ang Iloilo Provincial Health Office sa publiko nga halungan gid ang ikaayong-lawas samtang nagahilapit ang paskwa kag ang bag-ong tuig.
Sa interview sang Bombo Radyo kay Dr. Rodney Labis, Chief of Health Service Delivery Division kag Provincial Health Officer 1, iya ginpahayag nga sundon gid ang tatlo ka pahandumdom sang Department of Health.
Ini amo ang “Byahealthy Ngayong Pasko” pahanumdom sa nagabyahe nga likawan ang sobra nga pag-inom sa paskwa agud malikawan ang disgrasya.
Ikaduha amo ang “Tamang pagkain, ehersisyo at disiplina” nga isa man ka importante nga pahibalo agud malikawan ang insidente kaangay sang food poisoning kag sobra nga pagkaun sang mga matam-is nga pagkaon.
Ang ikatatlo amo ang “iwas paputok para kumpleto at ligtas sa mga disgrasya” kun sa diin ginarekomendar ang pag-gamit sang mga alternatibo nga pampagahud kaangay sang mga bagay nga patik-patikon, sound system, kag torotot.
