Nagpahanumdom ang Iloilo Provincial Health Office nga magsuksok sang medical mask subong nga may ara na sang reports nga nakalab-ot na sa pila ka bahin sang probinsya ang aso ukon haze nga naghalin sa wildfire sa Indonesia.
Sa interview sang Bombo Radyo kay Dr. Rodney Labis sang IPHO, iya ginpahayag nga importante man nga ipaiway anay ang indi man kinahanglanon nga outdoor activities ilabi na para sa mga indbidwal nga may ara sang sakit sa baga ukon iban pa nga mga balatian nga makatuga sang komplikasyon.
Suno man sa iya, importante nga nakabantay ang publiko sa mga balita ilabi na sa mga pahibalo sang mga awtoridad agud mahibaluan sang mga ini ang dapat nga himuon kag dapat likawan subong nga nakalab-ot na ang makahalalit nga aso sa pila ka lugar sa Pilipinas.
Nahibaluan nga kabahin sa mga lugar nga apektado sang nasambit nga haze amo ang banwa sang Miagao, Tubungan, kag iban pa nga mga kabanwahanan sa probinsya sang Iloilo.
