𝗕𝗔𝗗𝗜𝗔𝗡𝗚𝗔𝗡, 𝗜𝗟𝗢𝗜𝗟𝗢 — Nagpangabay ang Iloilo Provincial Health Office (IPHO) sa mga residente sang Badiangan, Iloilo nga magkoopirar sa pagsulundan sang Local Government Unit (LGU) agud nga makalikaw nga makagat sang lamok kag magka-dengue.
Ini matapos sunod-sunod nga narekord ang kaso sang sakit nga dengue, rason man nga nagdeklara ang banwa sang dengue outbreak.
Sa interview sang Bombo Radyo kay Dr. Maria Socorro Quinon, Head sang Iloilo Provincial Health Office, iya ginpahayag nga labing -importante ang kooperasyon sang mga residente ilabi na kun magpatuman ang banwa sang Indoor residual spraying bangud isa ini ka paagid agud mabuhinan ang mga infected nga lamok.
Suno kay Quiñon, mas makapamaayo kun magsuksok sang long sleeves ukon mga panapton nga makatago sang lawas agud malikawan nga makagat sang lamok kag maka-angkon sang amo nga sakit.
Ginpahayag man sini nga gilayon magpakonsulta sa doctor kag rural health centers sang banwa kun makabatyag sang pagpalanakit sang lawas, hilanat, ukon pagsakit sang ulo agud nga gilayon matatapan sang nagakaigo nga pagbulong.
Nahibaluan ga naglab-ot na sa 40 ang kaso sang dengue sa Badiangan kun sa diin, isa ang kumpirmado, samtang isa ang ginasuspetsahan nga napatay bangud sa dengue sa Barangay Odiongan.
Una nga napatay amo ang 15 anyos nga junior high school student kag isa ka college student nga napatay bangud sa ginapahayag dengue.
