Liwat nga nagpanugyan ang Iloilo Provincial Health Office (IPHO) sa publiko nga likawan ang tuman nga exposure sa init.
Sa interview sang Bombo Radyo kay Dr. Maria Socorro Quiñon, iya ginpahayag nga sa subong nga nagalab-ot sa 42-degree Celsius ang init, dako ang risgo nga mag-angkon sang heat related illness.
Lakip na diri ang heat exhaustion kag heat stroke.
Suno kay Quiñon, mahimo maka-eksperyensya sang amo nga balatian bangod sa tuman ka paang nga tyempo, dehydration ukon kakulangan sang tubig, sobra-sobra nga exercise, kag madugay nga direct exposure sa adlaw.
Mataas naman ang risgo sa mga infants ukon mga lapsag, mga nagatrabaho sa initan, may high blood, kag diabetes.
Dugang sini nga mag-inom gid sang madamo nga tubig kag likawan ang pag-inom sang hot tea, kape, soft drinks, kag makahulubog nga ilimnon bangud ini ang nagadugang sang dehydration.
Ginpahayag man sang natungdan nga magsuksok sang mga light colors nga panapton agud nga indi madali nga mainitan ang kalawasan.
