Nagpanugyan ang Iloilo Provincial Health Office (IPHO) sa publiko nga magdoble halong kasunod sang na-record nga una nga kaso sang monkeypox ukon Mpox sa Baguio City.
Sa interview sang Bombo Radyo kay Dr. Maria Socorro Quiñon, Head sang Iloilo Provincial Health Office, iya ginpahayag nga ang mpox ang indi naman bag-o sa Iloilo.
Suno kay Quiñon, ang epidemiology and surveillance unit sang probinsya ang functional agud nga kon may kaso man nga makasulod, gilayon nga matatapan.
Ginpahayag man sini nga ipaidalom anay sa maid-id nga mga test ang masuspetsahan nga may amo nga balatian agud matumod antes makumpirma.
Nagpasalig man ang natungdan nga sige-sige ang disease surveillance sa probinsya kag sa subong, wala pa sang may na-record nga monkey pox ukon mpox.
Padayon man ang surveillance sang amo nga balatian sa tagsa ka rural health units kag hospitals sa Iloilo.
