ILOILO CITY–Ginsaysay sang direktor sang Iloilo Provincial Police Office (IPPO) kun paano niya nahibaluan ang tuhoy sa natabo nga insidente sa mag-amay nga Iloilo 1st District Congressman Richard Garin kag Guimbal Mayor Oscar Garin batok kay PO3 Federico Macaya Jr.
Sa interview sang Bombo Radyo kay IPPO Director PSSUPT. Marlon Tayaba, iya ginpahayag nga sang Disyembre 22, las-4 sang kaagahon, nagtawag sa iya si  PSUPT Ruby Gumban, ang Deputy Provincial Director for Administration, agud isugid nga magabato ang mga katapo sang Guimbal PNP kay Mayor Garin apang wala man ginpatpat ni Gumban kun ano ang rason.
Ginmanduan niya gilayon si Gumban nga magpadulong sa Guimbal, Iloilo agud hibaluon ang sitwasyon.
Gintawgan naman ni Tayaba si P/SInp. Antonio Monreal Jr, ang anay hepe sang Guimbal Municipal Police Station kag ginpamangkot kun ano ang sitwasyon apang liwat-liwat lang nga ginasabat sang hepe nga maayo na kag kalmado na ang tanan.
Ginduhol pa ni Monreal ang iya cellphone kay Cong. Garin agud istoryahon si Tayaba.
Suno sa IPPO Director, ginhambalan siya ni Cong. Garin nga magapasaka sang kaso batok sa imbestigador sang Guimbal PNP nga si PO3 Macaya bangud sa kapaslawan nga pasakaan sang ang anak ni SB Member Gil Gegato nga naulamid sa rambol kadungan sa “Disyembre sa Guimbal”.
Sang pag-abot ni Gumban sa Guimbal Municipal Police Station, gintawgan niya si Monreal kag ginpamangkot man kun ano ang natabo, apang kaangay sa gihapon angginsabat ni Monreal.
Bangud sini, ginpatawag ni Gumban ang mga pulis agud kuhaan sang impormasyon kag gilayon naman nga ginpatawag ni Tayaba sa IPPO ang lima ka mga pulis nga ginaalegar nakakita sang hitabo kaupod si Macaya.
Didto na kag nahibaluan ni IPPO director ang kumpleto nga natabo sa diin ginpahayag ni Macaya nga makapila siya ka beses nga ginsipa, gintindakan, gintampa, ginsiko, ginduplaan ni Cong. Garin kag gintayaan pa siya sang pusil ni Mayor Garin sa sulod sang 30 ka minutos.