Sa maayo na nga kahimtangan si Iloilo Police Provincial Office (IPPO) Director Police Colonel Bayani Razalan matapos nadisgrasya ang iya ginasakyan sa Barangay Macatol, Pototan, Iloilo.
Natabo ang insidente sang padulong kuntani sila sa San Dionisio, Iloilo agud magtambong sang Tanod Academy.
Pag-abot sa nasambit nga barangay, gulpi nga nagliko ang ginasundan nila nga delivery truck rason nga nakabunggo ang ila nga salakyan sa likod sini.
Bangud sini, naguba gid ang panguna nga bahin sang ila salakyan.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga nakaeksperyensiya si Razalan sang pagpalanakit sang lawas apang wala na man sang dapat nga kabalak-an.
Suno kay Araño, ginpahayag naman sang driver sang closed van nga wala sini naantisipar sa iya pagliko nga malab-ot sang salakyan ni Razalan ang delivery truck.
